Zirna Huang: Career in Nursing.

Source: Hillsgate

Introduction

Angel of Mercy an tih mai thin, founder of modern nursing Florence Nightingale-i atang tawh reng khan nurse hna hi hna pawimawh leh zahawm tak a ni tih kan hre vekin a rinawm.

Nursing hi damlote an rilru leh taksa dam nana enkawltu ber an ni a. Kan hriat angin Doctor-ten damdawi chawh mah se, a nihna tur ang taka damdawi pek leh enkawl hna chu Nurse-te chan a ni thung.

Step-by-Step

Nurse chi hrang hrang zinga kan nih duh a zirin a luh hun leh luh dan a inang lo thluah thei a. Auxiliary Nurse Midwife/Health Worker (ANM) course zir turin Class X (HSLC) pass a tawk mai a, a course pawh kum 1 leh a chanve vel a ni tlangpui. Chutih rualin General Nursing and Midwifery (GNM) erawh chu kum 3 leh a chanve a ni tlangpui a, qualification pawh HSSLC pass (aggregate 40% marks) a ngai thung.

ANM leh GNM bakah hian Mizoram mai bakah India ram hmun hrang hrangah B.Sc Nursing a zir theih bawka. B.Sc Nursing zir tur hi chuan HSSLC (Biology, Chemistry, English, and Physics) a ngai thung a, mark pawh aggregate a 45% hmuh ngei a ngai a ni.

Indian Armed Forces hian hmeichhia, pasal la nei lo, kum 17- 24 te tan B.Sc Nursing Programme a nei a, 10+2 with 45% aggregate in Biology, Chemistry, English leh Physics tan kumtin dil theih a ni. Sipai chawm a zir tur hian medical leh written-ah tlin a ngai a, an zir chhuah hnuah sipai-ah kum 5 tal an thawh a ngai thung. Sipai a an thawh hian Leautenant-ah an lut nghal a, India rama sipai damdawiin hrang hrangah an thawk thin.

A chung lama kan han sawi tak Course hrang hrang bakah khian duh chuan Post Basic Speciality (one-year diploma)-te pawh zir tur a awm bawk. Zir a hautak em?

I zir duhna Institution a zirin hei hi chu a danglam thei viau ang. Sorkar enkawlahte chuan man tlawm zawkin a zir theih deuh zel a, private institution nen chuan rate a inthlau viau. Private Institution- ah chuan a tlangpuiin BSc Nursing zir man hi kum khatah Rs 50,000 vel atangin a intan a, GNM erawh chu course fee a tlawm deuh thung a, kum khatah Rs 45,000 vel atangin a intan tlangpui.

Funding/Scholarship

Institution hrang hrangin scholarship an nei thin a, thiamthei zual tan chuan heng Scholarship hmang hian engemaw chen chu a inchawm theih zel a ni. Scholarship pek theih zat erawh chu Institution azirin a danglam thei viau thung. Job Prospects

Nurse-te hi sorkarah leh private hospitals, nursing homes, orphanages, old age homes, industries, sanatoriums leh armed forces lamah te hna an hmu zung zung mai a ni. Heng bakah hian Indian Red Cross Society, Indian Nursing Council, State Nursing Councils leh Nursing institutions hrang hrangah a thiam tak tak tan chuan thawhna chance a tha hle bawk. ANM zirchhuakte tan pawh Health Centre hrang hrangah hna a awm reng a ni.

Nurse-te hian damlo enkawl chauh lo pawh hna dang an thawk thei tho mai. Medical College leh Nursing School hrang hrangan zirtirtu hna a thawh theih a. A thei tan phei chuan private firm dinin, terms & conditions fel tak siamin hlawk takin a thawh theih a ni.

Tin, International Nursing Certificate neih theih phei chuan foreign-ah hlawh sang tak takin a thawh theih reng bawk. Demand and Supply

Hriselna kan ngaih pawimawh tial tial avangin ram pumah Nurse mamawhna hi a tawp thei dawn reng reng lo a, Nurse hi kan indaihlo em em reng zawk a ni.

India ramah hian Nursing Council-a in register Nurse nuai 10.3 an awm a, heng zinga nuai 4 emaw chauh hi active takin an service leh nghal. In register tawh tam- tak chuan inneihna avangte, hmun danga insawn avangte leh pension vangte in Nursing hi an chawlhsan mek reng a. Chuvang chuan, ram puma Nurse mamawhna leh a supply hi a inmil lo hle reng a ni. Market Watch

Health care lamin hma a sawn chak em avangin Nurse zir hi tunhma zawng aiin future a bright lehzual tawh a. Damdawiin a pung zel a, Nursing Home a pung zel bawk a, hna a tam tial tial ang a, hlawh pawh a tam tial tial dawn a nih hmel.

Positives/Negatives

+ives

Hna tha leh him tak a ni.
Ram chhung leh ram pawnah hna hmuh loh tak tak a awm ve lo.
Midangte harsatna a tanpui theitu nih hi hna tha leh hlu tak anih mai bakah miin damna an chan hian mahni pawh a dam phah ve sawng sawng theih a ni. -ives

-ives

A hna hi hna hahdam tak a ni lem lo a, rual a pawl tak tak theih loh. Night duty hi ngei ngei ngai a ni.
A hna hi a hahthlak avangin stress neih a awl bik a, chu chuan rilru leh taksa natna a thlen thei.
He angel hna duhawm tak hi chawimawi hlawh lo leh hriatreng hlawh lo hna a ni. Fakna ai chuan sawiselna an dawng tam zawk.
Nupui/pasal neih a, chhungkua din hnuin chhungte ngaihsak hman mangloh a awl.