*Hnahthial mipui an huaisen, District nawr vangin thih an pawi sa lo*
- Zothankhuma, editor Virthli Daily newspaper, Lunglei.
July 15, 2002
Electric veng, College pengah Joint YMA huaihawt Hnahthial District Demand Commitee chuan NH 54 chu an blocked ta. Lirthei engchi mah kaltlang phal a ni lo. Lunglei atangin 3rd BN MAP chu truck trip 3 an lo chho a, PWD IB leh Ropuiliani Hall-ah an inkulh bawk a.
16th July 2002 pawh chuan an dang chhunzawm zel a.Sorkar atangin engmah thawm hriat tur a awm lo.
MNF Ministry lai a ni a, min bialtu MLA chu Pu F.Lalthanzuala a ni. Hahdam takin mi zawng zawng chu an awm a, an thla a muang hlawm hle. 'Kan sorkar chuan min ngai pawimawh ang a,kan thu-hla a tha zawngin a kal ngei ang', tiin an lo ngaihtuah a hlawm awm e. Chutihlai chuan information centre atangin an rawn au ta a, road block hlih a nih thu an rawn sawi ta.
Hmanhmawh tawkin ka tlan thla a,thil awmzia ka han hriat ve dan chuan sorkar lam atanga beisei tur leh sorkar aw engmah hriat a nih tak loh avanga hlih a nih thu chu a ni. Pawi ka ti em em a, thalaite kan lungawi lo, kan buai nuai nuai a, MZP President chuan thuzai zapin, Road Block chu chhunzawm a nih tur thu a sawi ta. Adhoc-in hruaitu kan indah nghal a, Valpuia chu Chairman atan kan dah a, kei chu Secretary- atan min dah ta.Tichuan, road block chu kan chhunzawm a. Vengchhung branch tin YMA chu duty dan tur kan siam a, kan in lungrual in duty kan tam hle a, Motor engemawzah kan dang tawh a,.CRPF Battallion insawn tur meuh pawh khaw pawnah kan dang hial a ni.
17th July 2002. Lunglei atangin Addl. DC, Superintendent of Police, Election officer leh mi pawimawh dangte an lo chho a, Ad-hoc-a hruaitute chu Pu H.Siamliana (L) in hnuaiah Chawhnu dar 2:00-ah chuan Hnahthial BDO Pu FJ.Liantluanga'n rawn tawiawmin, inbiakna kan nei a.
Min thlem ngar ngar a, min vau a, min tihthaih a, Road block chu hlip turin min nawr a. Keini lam chu kei leh Valpuia kan ni a, kan inbe rei hle. MNF movement leh Kolkatta bang bengnei leh round table conference thlenga sawiin, MNF leh India inbiakna tura Parva atanga Helicopter hmanga an hruai dan thlengin kan sawi a, Road block kan hlip lo a nih chuan sipai chakna hmanga kawng clear an tum tho thu min hrilh a, kei chuan Addl Sp Pu Zothanmawia hnenah chuan, 'Keini chu min tukzal (knockdown) thei a ni mai thei e, Kan rilru erawh min tukzal sak thei lovang' ka ti nghe nghe. Tichuan, keini chuan 'kan lo inrawn ve ang e,' kan ti a, kan inthen ta a. Kan thutlukna chu dar 4:00PM-ah hriattir turin min ti a, Hnahthial P/S number -a phone turin min ti a ni.
Kan han inrawn khawm a, road block chhunzawm zel kan titlu a, Chutihlai chuan Road block duty chu Lungleng branch YMA leh Peniel Branch YMA an ni a, veng dang thalai pawh tam tak an awm a, mahse, chhun ei tur kan pek theih loh avangin an riltam chu mahni in lamah inhnawh puar turin an haw hlawm a. Chutiang chu kan thu leh hla a nih tak avangin leh Police/sipai chu an rawn tirhthlak ngei kan rin avangin in auhkhawm kan tum a, Auto rickshaw-ah kan mike neih chhun chu kan phur a, aukhawm turin kan tlanchhuak a. Electric veng pengthuam atanga Bazar kan panchhoh(Pu Aingura kawt kan thlen) lai chuan Police ho chu an thuam famkim nen, an raldo position dik tak nen an rawn kal thla ta thup thup mai, Rang takin kan let a, College peng kan thleng hman deuh awrh mai, Kan han in rem fel zung zung a, Kan tlem lai tak a ni bawk si. A va manganthlak tak em!
Dar 4 a ri ta:
Police lam chuan Pu H.Faka kawtah tanhmun an rem a. Keini lam chu Pu Tlana (Lecturer) kawt atanga hmarlamah tanhmun kan khawh a. An awmphaw nen, an tiang fim relrul nen, Helmet nen, Silai nen, Raldo position-in an inrem a, Thla a phang duh hle mai. Keini lam chu kan tlem em avangin Police chu delay dan kan ngaihtuah a, Hmeichhe ho chu a hmalamah remin, mipa ho chu a hnunglamah kan dah a, Hmeichhia chu kut an thlak duh kan rin loh vang a ni. Tichuan, Addl Sp Pu Zothanmawia chuan aurinna hmang chuan thu a sawi a, 'Tunah hian Cr. Pc sec 144-na leh 145 hmangin thu ka pe che u a, in haw darh loh chuan Force chakna hmangin kawng hi kan clear dawn a ni' a ti a. Keini chuan kan rilru kan thlak duh si lo.
'Minute 5 kan nghak ang che u' a ti a, keichuan sana ka en vat a.
Minute 3 a liam mek lai chuan 'Lathi Charge' a tia, min rawn charge ta mai. Chutia kan buai takah chuan hmanrua kan nei ve si lo, ka bula ding Addl Sp Pu Zothanmawia chu ka vai vak a, a hmaiah ka vai fuh a, ka bula Police chuan ka darah min hlap a, ka tlu a, ka tho tur chu ka ngalah min roll a, a na duh ngei mai. Tear Gas an rawn kap a, (A hnu-a kan chhiar danin, avaiin mu 24 an kap zo vek a ni.) Min vaw zawt zawt a, min dim reng reng lo a,kan au chel chul a, hmeichhe ho chu hmatawnga kan dah avangin an tap chel chul a, a then an tlu a, a then an tlan chhia a. Kan tlem si, kan inbei rei lo ngei mai, kan tlan darh a, kei chu Electric Hall lamah ka tlan phei a,Ka bula tlangval thenkhat hnenah chuan Pu Hrangmana inbula an Prison Van dah chu han hal turin ka tir a, Police an tam em avangin thlanglam atanga helkual turin an kal nghal a. Mittui nen, hnap tui nen, kan ri nuai nuai a ni ber e. Chutih lai chuan veng thenkhat YMA information atang chuan Police nen kan inbeih thu an lo au a.
VCP Pu H.Siamliana (Lungleng veng) leh Pu H.Zothankhuma Virthli editor chuan ban an rawn phar ta.(Pu Zothankhuma hian a camera in thla a lo la char char nghe nghe) Pu H.Siamliana te hian ban chu phar lo se, min thah vek hial an duh a, Silai kap turin position an la fel vek hman tawh a ni. Tichuan, kan in au khawm a, Damdawiin atangin hliamte buaipui turin Doctorte leh Nurse te an chah nghal a, Hliam na zualte chu an phur chho nghal a.
Sawi tak ang khan hetih lai hian veng hrang hrang atanga thalai awm bakah Lungleng nula leh tlangval thenkhat leh Peniel nula leh tlangval, Elctric thalai tlem azawng chauh kan awm a. Hetia kan buai zualpui a reh meuh chuan Hnahthial thalai, nu leh pa leh a hria apiang chu an lo tlan khawm a, Chhim lam leh hmar lam atangin ruang chaicheh an rawn thlak ta. Mipui thinrim chuan Police chu chil nghal mai an duh a, Silai nen kawnglaiah chuan position la-in, hnunglam leh hmalam in hawitawnin awmhnum an rem a, Kan thalai thenkhatte thisen a luang a, hliam an tuar an hmuh meuh chuan Thinrimna chu a so a, a sa bulh bulh ani.
Damdawinah chuan mi 28 an admit a, hliam zinga upa ber chu Pu H.Sainghinga Peniel veng hi a ni. A then chu First Aid an pe a, an haw tir nghal a.
Kei pawh chu ka sil thum mai, ka hnungzang chu a na ngawih ngawih a, ka chawn chu a sen tul bawk a, ka kut veilam hnunglam atang chuan thisen a chhuak ser ser bawk a. Mahni inbuaipui hman ka ni lo. Rilru a va na em! Thisen tam tak a chhuak a, dimna tel miah lovin min vua a, min kah tumin silaiin min tin a, Ka rilru-ah chuan 'Thih rak thleng law lawin aw' tih chauh a awm a, chumi au chuan ka aw a chhang hial a ni.
Zanah chuan amak amak atam Thalai leh Nu leh pate chuan Electrc an pankhawm a, Lunglei atangin MAP truck trip 5 an lokal belh tih thawm a awm bawk nen; Thalaite chuan hmanraw awm ang ang an ngaihtuah a, dawrkaia marble zawng zawng pawh an lei zo vek niin an sawi.
Zanah chuan SP Pu Saithanga chuan min ko a, ka kal duh lo a. Police an rawn tirh hnenah chuan, 'SP mai mai biak chi ka ni tawh lo, Hnahthial bial mipui aiawhin kan ding a, cabinet level lo chuan min be lo ang' ka ti nghe nghe. Tichuan, zan khuain buaina dang a awm ta lo a, a tuk zingah chuan 'Hnahthial Kohhran Joint Action Committee' (KHJAC) chu lo kalin, Pathian hminga Road block chu hlip tur leh, kan hlip lo a nih chuan 'Hnahthial khawpui chhungah thisen tam tak a luang dawn si a, an thisen mawh kan phur ngam lo ang' tia Pathian hminga min rawn ngen avangin zing dar 8:00-ah chuan Road Block chu kan hlip ta.
Chhunah chuan Pu K.Lalsangluaia Inah Addl DC leh SP hovin kan meeting a, kan buaina avanga bungraw chhia zawng zawng chu zangnadawmna min pe turin kan phut a, damdawiina hliam tuar awm zawng zawngte enkawlna chu pe turin kan phut bawk a, Tichuan,Aizawla kala, CM hmu turin kan inrem ta bawk a ni.
(Amah Pu PC Marema'n a dam laia a ziaha ni. A thupui hi a fapa Tetea aka Hlima Pachuau-in 'Hnahthial District Movement' tihin a phuah a ni)
0 Comments